БИШКЕК, 21-дек. — Sputnik. Өлкө боюнча сасык тумоо менен ооругандардын саны азайганын Саламаттык сактоо министрлигинин маалымат кызматы билдирди.
Ага ылайык, бир жуманын ичинде медициналык жардам сурап кайрылгандардын саны дээрлик эки эсеге төмөндөгөн.
"12-декабрга карата сасык тумоо менен ооруп кайрылгандардын саны 8735 болсо, 19-декабрга карата 5021 кайрылуу болгон", — деп айтылат маалыматта.
Азыр балдардын мектепке баруусу кадимки калыбына келип, Жалал-Абаддын Кара-Көл районунда — 1, Ысык-Көлдүн облусунун Ысык-Көл жана Ак-Суу райондорунда бирден мектеп, Талас облусунун Манас районундагы бир мектеп жабык турат.
Саламаттык сактоо министрлиги учурда эпидемиологиялык абал көзөмөлдө экенин баса белгиледи.
