БИШКЕК, 21-дек. — Sputnik. Президент Алмазбек Атамбаев Индияга болгон иш сапарынын алкагында кыргыз-индия бизнес форумуна катышты. Бул тууралуу мамлекет башчынын маалымат кызматынан кабарлашты.
Президент жыйын учурунда ишкерлер туш болуп жаткан кыйынчылыктарды жакшы билерин айткан.
"Менин саясий карьерам бизнесмен кезимде башталган. Өлкөбүз көз карандысыздыкка ээ болгондон кийин Кыргызстанда алгачкы жеке бизнес ачкандардан болдум. Мен ишкерлердин башына келчү кыйынчылыктардын баарын көрдүм", — деп билдирди Атамбаев.
"Мен Кыргызстанда бизнесмендерди кайра-кайра текшерип, пара талап кылбастан, аларга өлкөнү багып жаткан адамдар катары мамиле жасалган маанайды жаратууга ар дайым умтулуп келгем", — деди өлкө башчысы.
Ал ошондой эле укук коргоо органдарынын реформасы тууралуу сөз кылып, ишкерлерди бир гана салык кызматы текшере турганын белгиледи.
"Менимче, биз бизнес эң мыкты корголгон өлкө болобуз. Бизнес Европадагыдай корголушун тилек кылар элем", — деген Алмазбек Атамбаев быйыл биринчи жолу чакан жана орто бизнеске жылына 4-5 пайыз менен 10 миллиард сом бөлүнгөнүн кошумчалады.
Мамлекет башчы индиялык ишкерлерди Кыргызстанга инвестиция салууга чакырды. Ошондой эле Тышкы иштер министрлиги менен президенттин аппаратына Индия жарандарынын виза алуу жол-жоболорун жеӊилдетүү мүмкүнчүлүгүн кароону тапшырды.
