БИШКЕК, 21-дек. — Sputnik. Көз карандысыз мамлекеттер шериктештигине мүчө өлкөлөр мындан аркы экономикалык жана саясий жаатта кызматташууну чыңдоо боюнча ойлонушу керек. Мындай пикирин легендарлуу парламенттин төрагасы Медеткан Шеримкулов "КМШга 25 жыл: жоготуулар жана жетишкендиктер" аттуу видео көпүрө учурунда билдирди.
Экс-төрага мурда кишилер бир чоң мамлекеттин жараны болуп бири-бирине тоскоолдуксуз каттап келсе, бөлүнүп кеткенден кийин бири-бирине уруксат берүүчү түрдүү документтер менен гана каттап калганын баса белгиледи. Анын айтымында, КМШ мамлекеттери ичинде жүрүүнүн тартибин жеңилдетүү керек.
"СССРди сактай албай калганыбыз үчүн бардыгыбыз өкүнүшүбүз керек. Ар бирибиз "улуттук батирлерге" кире качтык. КМШ мамлекеттери мындан аркы мамилесин жакшыртышы керек. Мисалы кыргызстандыктардын коңшу мамлекетте жашап кетүүсү кыйын болууда. 25 жыл бул аз убакыт эмес. Биздин бирдиктүү аймакта адамдардын жеңил жашап кетишине шарт түзүү колубуздан келет", — деди Шеримкулов.
Ал ошондой эле КМШ мамлекеттери аймакты туруксуздаштырууга кызыкдар болгон тышкы күчтөргө туруштук бере ала турган күчтүү система курушу зарылдыгын баса белгиледи.
Видеокөпүрө Астана, Москва, Бишкек, Кишинев, Ереван, Баку, Минск шаарларынын ортосунда өттү.
