Окуя Сузак районунун аймагында болгон.
"1990-жылы туулган Алишер короодо жүргөн чоң энесин жөндөн-жөн туруп эле качканына болбой кубалап барып, шыпыргы менен эки-үч ирет чаап жиберген. Коркуп кеткен кемпир бакты карай качканда артынан жетип барып, таяк менен чаап калганга үлгүргөн. Ал өзүн жоготуп койгондо, Алишер аны короосунда жыйылып турган отундардын жанына алып келип, дөңгөч менен башка чаап, кемпир алган оор жаракаттардан улам короодо каза болгон", — деп билдирди Токтошова.
Сузак райондук соту ага 21-сентябрда Кылмыш Жаза кодексинин 97-беренесинин негизинде беш жылга эркинен ажыратып, жазасын күчөтүлгөн тартиптеги түзөтүү абагында өтөө чечимин чыгарган.
"Соттун жогоруда айтылган өкүмү менен макул болбой соттолуучунун жактоочусу апелляциялык даттануу менен Жалал-Абад облустук сотуна кайрылган. Жалал-Абад облустук соту кылмыш ишти карап, 2016-жылдын 30-ноябрындагы өкүмү менен Сузак райондук сотунун 2016-жылдын 21-сентябрындагы өкүмүн өзгөртүүсүз калтырды", —деп билдирди маалымат катчы.
Токтошова Сузак райондук сотунун 2016-жылдын 21-сентябрындагы өкүмү мыйзамдуу күчүнө киргендигин кошумчалады.
