БИШКЕК, 19-дек. — Sputnik. Шайлоо мыйзамдарын одоно бузганы үчүн "Жаңы шаар" партиясы жергиликтүү кеңешке болгон шайлоодон четтетилгенин Борбордук шайлоо комиссиясынын мүчөсү Алмаз Асаналиев Sputnik Кыргызстан маалымат агенттигине билдирди.
"Биз бул маселени партия лидери Тилек Нааматбеков менен чогуу карадык. Ал базар жетекчисинин уулу экен. Нааматбеков катачылыктар кетирилгенин моюндап, жумушчу комиссиянын жыйынында жеке жоопкерчиликти ала турганын айтты", — деди Асаналиев.
БШК мүчөсүнүн айтымында, Нааматбеков жалпы партиянын каттоого алынышын жокко чыгарбастан, анын жеке өзүн гана четтетүүнү суранган.
"Партия кишилердин тобунун кызыкчылыгын көздөп, мыйзам чегинде иш кылыш керек. Тилекке каршы, андай болгон жок. Андыктан БШКнын мүчөлөрү алардын каттоосун жокко чыгаруу боюнча чечим кабыл алышты", — деди ал.
Асаналиев ошондой эле партиянын шаардык кеңештеги орду жети пайыздык босогону ашкан калган партияларга тегиз бөлүнүп берилерин кошумчалады.
Алдын ала жыйынтыктар боюнча Кара-Балтадагы жергиликтүү шайлоого 10 миң 939 киши катышкан. 14 партиянын ичинен жети партия өткөн. Алардын ичинде "Жаңы шаар" партиясы дагы бар. Бул партияга 947 киши өз добушун берген.
