БИШКЕК, 15-дек.— Sputnik. Референдумга жана жергиликтүү кеңештердин депутаттарын шайлоого байланыштуу өлкөнүн прокуратура органдарына 20 кайрылуу түшкөн. Бул тууралуу Башкы прокуратуранын маалымат кызматы кабарлады.
Үч кайрылуу жарандардын шайлоо укугунун бузулушуна байланыштуу болгон. Арыздар шайлоо комиссиясына жана Мамлекеттик каттоо кызматына кароого жиберилип, кайрылуу негиздүү деп табылган. Ошондой эле алардын шайлоого катышуу конституциялык укугу калыбына келтирилген.
Беш арыз шайлоо алдындагы үгүт иштериндеги мыйзам бузууларга байланыштуу болгон. Алар ички иштер органдарына жана аймактык шайлоо комиссиясына жиберилген.
Калган арыздар шайлоо комиссиясынын курамына жана саясий партиялардын талапкерлеринин тизмесине байланыштуу болгон.
Башкы прокуратура 11-декабрда өткөн референдумда жана жергиликтүү кеңеш шайлоолорунда массалык мыйзам бузуулар жана шайлоонун жыйынтыгына таасир эткен окуялар боюнча арыздануулар болбогонун белгилейт.
Бирок ага карабай көзөмөлдөөчү орган келген бардык билдирүүлөр жана каттар боюнча текшерүүлөрдү улантып, тиешелүү органдардын кабыл алган чечимдеринин негиздүүлүгүн жана мыйзамдуулугун көзөмөлдөө улантылат.
