БИШКЕК, 14-дек. — Sputnik. Базар-Коргондук дыйкан Баймырза Халмырзаев миллион сомго өз үйүндө 30 тонналык муздаткыч, тагыраагы логистикалык жай куруп, учурда сыноо максатында үч тонна курманын мөмөсүн сактап жатат.
Дыйкан 3 жылдан бери изденип жаткан ийгилиги ишке ашып муздаткыч куруп эле токтоп калган жок. Ал эки гектар жерге жүзүм, бир гектарга миң түп курма өстүрүп баштады. Бул жылы жүзүмү мөмө байлап, базарга сатыкка чыгарды. Ал эми келечекте муздаткыч кампанын ичин 100 тонналык көлөмгө кеңейтүүнү пландап жатат.
Ал алгач аппаратка 50 сотых жерге эккен болгар калемпирин кыштын аягына чейин сактап, беш сомдон өткөрүп жүргөн жашылча-жемишин 50 сомдон сатууга жетишип, алган аппаратын актаган. Кытайдан төрт миң долларга алып келинген муздаткычты орнотуу карапайым дыйкан үчүн оңойго турган жок. Анткени каражат маселеси кыйындык жаратып банктан насыя алган. Ал эми учурда эмгегинин акыбети кайтып, муздаткычтын жыйынтыгы жакшы чыгып, анын ичиндеги температура төмөндөөдө.
"Жашылча жемиштердин ичинен курма 25 градус муздак абада муздаткычта сакталат. Анткени тоңуп калган жемишти жылдап сактоого болот. Ал эми калган жемиштерди 0 градуста үшүк алып кетет. Ошол себептен өлкөдөн сыртка экспорттоо үчүн муздаткыч колдонуу керек болот", — деди дыйкан Халмурзаев.
Ал быйыл биринчи жолу курма сактап аны жаңы жыл алдында сатыкка алып чыгууну көздөөдө. Ал дайыма дыйканчылык менен алектенип, изденүүнүн үстүндө жүрөт. Райондук бийлик дыйкандардын жер-жемишин экспорттоо үчүн бир топ өлкөлөр менен келишим түзүп, быйылкы жылы сатыкка чыгарганга үлгүрдү.
