БИШКЕК, 13-дек. — Sputnik. Түрк полициясы өлкөдө тыюу салынган "Күрд жумушчу партиясынын" жана "Күрдстан эркиндигинин шумкарлары" радикалдык тобуна тиешеси бар деп шектелген 235 адамды кармады. Бул тууралуу Түркиянын Ички иштер министрлигинин сайтында чыккан маалыматка шилтеме кылып РИА Новости билдирди.
Маалыматка ылайык, кармалган адамдар социалдык тармактарда терроризмге үгүттөө иштерин жүргүзгөн, өлкөдөгү террористтик уюмдарга катыштыгы бар деп айыпталууда.
Буга чейин "Күрд жумушчу партиясынын" активисттерин кармоодо бир нече түрк провинцияларында издөө иш-аракеттери жүрүп, 118 адам кармалгандыгы маалымдалган.
Эскерте кетсек, ишемби күнү кечинде Стамбул шаарындагы "Водафон Арена" стадионунун жанында жардыруу болгон. Көп өтпөй полиция дагы бир теракт болгондугун кабарлаган.
Мурдараак Түркиянын вице-премьери Нуман Куртулмуш терактыга Түркияда тыюу салынган "Күрд жумушчу партиясынын" тиешеси бар деп эсептей турганын билдирген. Кийинчерээк жардыруунун жоопкерчилигин "Күрдстан эркиндигинин шумкарлары" радикалдык тобу өз мойнуна алган.
