БИШКЕК, 11-дек. — Sputnik. №5316 шайлоо участкасы айрым ЖМКлар жазып жаткандай самсаканада ачылбаганын БШКнын Ош шаары жана облусу боюнча координатору Расул Кадыров Sputnik Кыргызстан агенттигине билдирди.
Анын айтымында шайлоо участкасы кафеде ачылган.
"Бул кафенин ичи кенен болгондуктан анда шайлоо өткөрүүгө болот. Негизи шайлоо участкасын "Нооруз" ресторанында ачууну пландаганбыз. Бирок ал жакта той боло тургандыктан башка жакка көчүрдүк", — деди Кадыров.
Кыргызстан боюнча 22 шаар жана 389 айылда жергиликтүү кеңешке шайлоо өтүүдө. Шайлоого жалпысынан 2 миллион 350 миң жаран катышууга укуктуу. Ал эми негизги мыйзамга өзгөртүү боюнча 2 миллион 825 миң адам добуш бере алат.
Саат 16:00гө алынган маалыматтар боюнча референдумга шайлоочулардын 28,1 пайызы добуш берсе, жергиликтүү кеңештерге болгон шайлоого жарандардын 29,1 пайызы добушун берген.
