БИШКЕК, 11-дек. — Sputnik. Баш мыйзамга өзгөртүү киргизүү боюнча референдумга Корея менен Түркиядагы кыргыздар активдүү катышып жатат. Бул тууралуу аталган өлкөдөгү мекендештер Sputnik Кыргызстан агенттигине кабарлашты.
Кореянын Сеул шаарында иштеп жүргөн Медербек Жолдошевдин айтымында шайлоо участогу жарандарды жайылган дасторкон менен тосуп алган.
"Мага кыргыз элчилигинен эки күн мурда чалып, референдум боюнча эскертишкен. Бүгүн бир нече жердештер чогулуп, бир унаага отуруп алып добуш берүүгө барып келдик. Биз саат 10:00дө барганбыз. Бизге чейин 40дан ашык адам келип кеткенин айтышты. Бул жакта дагы меймандостук салтыбызды унутушпай, элчилик өкүлдөрү дасторкон жайып, чай берип жатышыптыр", — деди Жолдошев.
Ал эми Анкарадагы кыргыз диаспорасынын башкы катчысы Адилет Абишов жарандар атайын автобус жалданганын билдирди.
"Анкаранын борборундагы Кызылай аянтында жайгашкан "Гувенпарк" аялдамасында Кечиорен муниципалитетинин автобусу менен элди шайлоо участогуна чейин алып келип жатабыз", — деди Абишов.
Анын айтымында эл автобус менен үч жолу ташылат.
Белгилей кетсек, бүгүн Кыргызстанда жергиликтүү кеңештерге шайлоо жана Баш мыйзамга өзгөртүү киргизүү боюнча референдум өтүп жатат. Жергиликтүү кеңешке шайлоо 22 шаар жана 389 айылда өтүүдө.
Баш мыйзамда эмнелер өзгөрүп жаткандыгын Sputnik Кыргызстан инфографикасынан көрүңүздөр>>
