БИШКЕК, 7-дек. — Sputnik. Жүргүнчүнү унаасы менен сүйрөп өлтүрүп алган айдоочу кармалды. Бул тууралуу Ош ШИИБдин басма сөз катчысы Замир Сыдыков Sputnik Кыргызстан агенттигинин кабарчысына билдирди.
Маалыматка ылайык, 5-декабрь күнү болжол менен түнкү саат 02:30дар чамасында Озгур — Ош жолунда кыргыз жаранына таандык Lexus RХ-300 үлгүсүндѳгү унаанын арткы орундугунан Ош шаарынын Озгур айылынын 57 жаштагы тургуну Марипат Эрменбетова түшүп жатып, оң колу унаанын эшигине кыпчылып калган. 37 жаштагы айдоочу мас болгондуктан унааны катуу ылдамдыкта айдап, аталган аялды бир нече метрге унаасы менен сүйрѳп кеткен.
Натыйжада жабырлануучунун денеси бир нече жеринен айрылып, окуя болгон жерде каза болгон.
Айдоочу жабырлануучунун оор абалда, кыймылсыз жатканын кѳрүп, бирок жардам көрсөтпөстөн окуя болгон жерден изин жашырып качып кеткен.
Күбѳлѳр айдоочунун Озгур айылынын кире беришиндеги дүкѳндѳн ичимдик ичип жаткандыгын кѳргѳндүгүн айтышып, кѳрсѳтмѳ беришти.
Ош шаардык ички иштер башкармалыгынын кызматкерлери тарабынан изи сууй электе Жалал-Абад облусунун Кѳк-Жаңгак шаарынын тургуну кармалып, убактылуу кармоочу жайга киргизилди.
