БИШКЕК, 7-дек. — Sputnik. Ысык-Көл облусунун Түп районунун прокуратурасы милиция кызматкерлерине Б. А. аттуу жарандын ден соолугуна залака тийгизүү фактысы боюнча кылмыш ишин козгоду. Бул туурасында аталган көзөмөл органдын маалымат кызматы билдирди.
Башкы прокуратурасынын билдирген маалыматына таянсак, аларга 21-ноябрдан 22сине караган түнү Түп райондук ИИБдин кызматкерлеринин үстүнөн жергиликтүү тургун "балама коркутуу жолу менен күч колдонуп, ден соолугуна залака тийгизди", — деген арыз менен кайрылган.
Жабырланган Б. А. Түп аймактык ооруканасына жаткырылган.
Көзөмөл органы КРдин Кылмыш, жаза кодексинин 305-1-беренеси (Кыйноо) менен кылмыш иши козголгондугун, учурда иликтөө иштери уланып жаткандыгын айтты.
