БИШКЕК, 5-дек. — Sputnik. АКШнын Лос-Анджелес шаарында метро куруп жаткандар 10 миң жылдык мастодонттун калдыктарын таап алышты. Бул маалыматты РИА Новости San Diego Union-Tribune гезтине шилтеме берип жазды.
Жумушчулар беш метр тереңдиктен бир метрдей азуу тиштерди жана анын сыныктарын табышкан. Ал жерге палеонтологдор барып атайын казуу иштерин жүргүзгөндө, экинчи жаныбардын дагы бир нече сөөк калдыктары табылган.
Метрополитендин өкүлү Дэйв Сотеро бул табылга 10 миң жыл мурда жашаган жаныбарларга таандык экенин билдирди. Эми окумуштуулар бул сөөктөр кайсы жандыкка тиешелүү экенин аныкташат.
Үстүбүздөгү жылдын 10-мартында Ысык-Көл облусунун Ак-Суу районунда Жыргалаң суусунун боюнда жергиликтүү тургундар мамонтко окшош жандыктын азуу тишин табышкан.
