Жалал-Абаддагы уникалдуу делген жаңгак токою жоголуп кетүү коркунучунда турганын "Агро-Лид" коомдук бирикмесинин жетекчиси Гүлназ Касеева фестивалдын жүрүшүндө билдирди.
Анын айтымында, аталган фестиваль эки максатты көздөйт.
"Биринчиден Кыргызстандагы жапайы жаңгак токоюнун абалы менен коомчулукту кабардар кылуу. Анткени миллион жылдан бери турган уникалдуу токой деградацияга учурап жоголуп кетүү коркунучунда турат. Экинчиден, жаңгакты экспорттоого көңүл буруу. Анткени, ушу тапта кыргыз жаңгагы чет өлкөгө Кыргызстандын атынан эмес, башка мамлекеттердин аты менен кетип жатат. Мындан улам атайын долбоордун алкагында жаңгактын түрү, андан чыгарылган продукцияларды тартуулап фестиваль уюштуруп жатабыз", — деди Касеева.
Жаңгак фестивалы өкмөттүн Жалал-Абад облусундагы ыйгарым укуктуу өкүлчүлүгү жана бейөкмөт уюмдардын каржылоосунда уюштурулган. Анда токой чарбаларда өндүрүлгөн продукциялар жарманкеге коюлуп, жаңгак кошулуп жасалган 40тан ашуун шириндиктер, кургатылган мөмө-жемиштер тартууланды.
Бүгүнкү күндө аталган облуста 850 миң гектар жерди токой ээлесе, анын 40 миң гектарында жаңгак, 32 миң гектар жерине мисте, 1700 гектарда бадам өсөт.
