БИШКЕК, 11-ноя. — Sputnik. Бишкектин борборундагы Эмен багында Кыргызстанды чейрек кылым башкарган саясий жана мамлекеттик ишмер Турдакун Усубалиевдин эстелиги ачылганын өкмөттөн кабарлашты.
Усубалиевдин айкели борбор калаадагы Иманалы Айдарбеков, Абдыкерим Сыдыков, Абдыкадыр Орозбеков, Баялы Исакеев, Жусуп Абдырахманов, Касым Тыныстанов, Төрөкул Айтматов, Исхак Раззаков, Төрөбай Кулатов, Султан Ибраимов, Арстанбек Дүйшеев, Абсамат Масалиев, Болот Мамбетов, Абды Сүйөркулов жана Акматбек Сүйүмбаев сыяктуу мамлекеттик ишмерлердин эстелиги орнотулган аллеяга коюлду.
Салтанаттуу иш-чарага катышкан премьер-министрдин милдетин аткаруучу Сооронбай Жээнбеков аталган аллея өлкөнүн өнүгүшү үчүн кан-жанын аябаган ишмерлерди даңазалоо үчүн курулганын белгиледи.
Ал Усубалиевдин кыргыз эли, мамлекети үчүн жасап кеткен зор эмгегин белгилеп, өлкөгө кызмат кылуунун мыкты үлгүсүн көрсөтүп кеткенине токтолду.
"Турдакун Усубалиевичтин акыркы китеби "Жүрөгүмдө — Кыргызстан" деп аталат. Ушул аталыш менен эле адамдын бейнеси ачылып турат. Элинин ардактуу жараны өлкөгө кызмат кылууну башкы максат кылган. Турдакун Усубалиевдин ысымы кыргыз элинин эсинде түбөлүккө сакталат", — деди Жээнбеков.
Эстеликти ачуу иш-чарасына президенттин аппарат жетекчиси Фарид Ниязов, ЖК төрагасынын орун басары Нурбек Алимбеков, саясий жана мамлекеттик ишмер Апас Жумагулов, ошондой эле Усубалиевдин жакындары катышты.
