БИШКЕК, 11-ноя. — Sputnik. Шайлоого катыша турган партиялардын көбү Бишкек шаардык кеңешке өтүүгө кызыкдар экенин маалымат жыйында Борбордук шайлоо комиссиясынын төрайымы Нуржан Шайлдабекова билдирди.
Мыйзамга ылайык, бүгүн, 11-ноябрда үгүт иштери башталды.
Шайлдабекованын айтымында, 21 шаардык кеңешке 35 партия катталган, дагы бири каттоодон өтүп жатат.
"КСДП менен "Республика — Ата-Журт" партиялары бардык шаардагы жергиликтүү кеңеш шайлоосуна катышат. "Өнүгүү — Прогресс" Сүлүктүдөн башка шаарларда өтө турган шайлоодо күч сынашат, "Кыргызстан" партиясы 17 шаарда ат салышмай болуп жатат. Калган партиялар жети же андан аз шаарда күчүн сынамакчы", — деди БШК төрайымы.
Шайлдабекова баарынан көп партия Бишкекте (14), эң азы Сүлүктү (3) шаарында ат салыша турганын белгиледи.
