БИШКЕК, 7-ноя. — Sputnik. Бүгүн Токтогул Сатылганов атындагы улуттук филармонияда Кыргыз Эл акыны Майрамкан Абылкасымованын 80 жылдыгы белгиленди. Бул тууралуу КТРКнын башкы директорунун радио уктуруулар боюнча орун басары Кайрат Иманалиев билдирди.
Анын айтымында, акындын 80 жылдык мааракесин куттуктаганы бийлик өкүлдөрү, депутаттар, замандаштары келишти.
"Сахнада акындын ырларына жазылган обондуу ырлар ырдалып, белгилүү ырчылар Майрам Дүйшекеева, Асылбек Өзүбеков, Гүлзат Байзаковалар өнөр тартуулашты. Ошондой эле көлөмдүү чыгармаларынан театрлаштырылган көрсөтүү болду. "Атаке баатыр", "Жаңыл Мырза", "Курманжан Датка" жөнүндө көлөмдүү ырларын, "Эстелик сүйлөйт" поэмасын Улуттук академиялык драма театрдын актерлорунун аткаруусунда сунушталды", — деди Иманалиев.
Абылкасымова 1980-жылы "КРдин Эл акыны" деген ардактуу наамга ээ болгон. Акындын ырлары орус, украин, француз, болгар тилдерине да которулган.
