БИШКЕК, 3-ноя. — Sputnik. Кытай ШКУ мамлекеттеринде коопсуздукту күчөтүү боюнча чараларды кабыл алууну сунуштап, экономикага басым жасоого чакырат. Мындай билдирүүнү аталган өлкөнүн премьери Ли Кэцян Бишкекте өтүп жаткан Шанхай кызматташуу уюмунун кеңейтилген форматтагы жыйынында жасады.
Анын айтымында, уюм алдыга умтулуп, бир топ ийгиликтерге жетишкен. Аймактык жана эл аралык маселелерди чечүүдө, коопсуздукту камсыздоодо таасири күч.
"Коопсуздук жана стабилдүүлүктү бекемдөө жаатындагы иш-чаралар ШКУ мамлекеттеринин өнүгүүсүн шарттайт. Уюм бирикмеге мүчө өлкөлөрдүн көз карандысыздыгын колдоого алат. Афганистан менен түзүлгөн кырдаалда аталган өлкөдө стабилдүүлүктү орнотуу үчүн Кытай ШКУнун бардык мүчөсү менен иштешүүгө даяр", — деди Ли Кецян.
Кытай премьери жалпы рынок түзүү, индустриализация деңгээлин жогорулатуу зарылдыгын белгиледи.
"Интеграцияны өнүктүрүү керек, мамлекеттер аралык соода жүргүзүүдө улуттук валюта менен эсептешүүнү киргизүү зарыл. Бул эки тараптуу мамилелерди өнүктүрүүгө өбөлгө болот", — деди ал.
Ли Кэцян долбоорлорду ишке ашыруу үчүн жергиликтүү калкты жумуш менен камсыздоо максатында жергиликтүү товарларды алууга чакырды.
