БИШКЕК, 31-окт.— Sputnik. Кытайдын мамлекеттик кеңешинин премьери Ли Кэцяндын Кыргызстанга боло турган расмий сапарында бир катар документтерге кол коюлат. Бул тууралуу ТИМдин биринчи саясий департаментинин башчысы Айбек Молдогазиев Бишкекте өткөрүлгөн маалымат жыйында билдирди.
Анын айтымында, расмий сапар 2-ноябрга белгиленген.
"Ли Кэцян Кыргызстандын президенти жана премьер-министри менен жолугат. Анда базар-экономикалык кызматташтык, маданий-гуманитардык мамилелерди чыңдоо, транспорт, өнөр-жай жана энергетика тармагындагы биргелешкен долбоорлор талкууланмакчы", — деди Молдогазиев.
Ошондой эле өкмөттөр аралык жана эл аралык деңгээлдеги документтерге кол коюлмакчы.
