БИШКЕК, 28-окт. — Sputnik. Евразиялык экономикалык биримдикке кирген мамлекеттердеги эмгек мигранттарынын маселелери жана аларды кандай себептер менен депортация кылып жибериши мүмкүндүгүн КР мамлекеттик миграция кызматынын өкүлү Улан Шамшиев Sputnik Кыргызстан агенттигиндеги маалымат жыйында билдирди. Маалымат жыйында Астана, Бишкек жана Москва студиялары менен видео байланыш болду.
"Өз укуктарын коргоодо айрым тоскоолдуктар чыгууда, ал "кара тизме". Сентябрда анда 117 миңден ашык кыргызстандык бар болчу. Ага административдик эреже бузган, жол эрежесин бузуп, айыпты төлөбөй койгондор да кирип калууда", — дейт Шамшиев.
Ал ошондой эле жашаган жери менен каттоого турган жеринин даректери дал келбей калышы да экинчи себеп болуп жатканын кошумчалады.
"Андыктан жумуш берүүчүлөр эмгек келишимин ИИМден жана кызматка орноштуруу борборлорунан каттоодон өткөрүп жатканына көңүл буруу керек. Андай болбогон учурда анын юридикалык күчү болбойт", — деп Шамшиев эскертти.
Видео көпүрөнүн катышуучулары мигранттар менен кандай иш алып барылып жатканын айтышты. "Кыргызстан — Астана" этно маданият бирикмесинин төрагасы Шавкат Исмаиловдун айтымында Казакстанда "Жарыя" фонду иштейт.
Россиядагы диаспоранын өкүлү Кубанычбек Осмонбеков алар Кыргызстандын аброюн көтөрүү үчүн аракеттер көрүлүп жатканын баса белгиледи. Ошондой эле, мигранттардын укуктары менен милдеттерин түшүндүрүү боюнча иш аракеттер жүргүзүлөт.
"Кара тизме" 2014-жылдан тарта иштей баштаган. Ага Россиянын мыйзамдарын ошондой эл миграциялык тартипти бузгандар түшөт. Бул тизмеге киргендер Россияга кире алышпайт.
