БИШКЕК, 25-окт. — Sputnik. Москвада мекендешин тоноого шектелип үч кыргызстандык кармалганын Ички иштер министрлигинин (ИИМ) маалымат кызматынан кабарлашты.
Билдирмеге караганда, ИИМдин Россиядагы өкүлчүлүгүнө 25 жаштагы кыргызстандык жаран 18-октябрда арыз менен кайрылган.
"Арыз ээси 18-октябрга караган түнү азиат улутундагы белгисиз эки адам батир ичине кирип аны сабап, документтери менен 71 миң 810 рублин алып кеткенин билдирген", — деп айтылат маалыматта.
Уурулар жабырлануучуга телефон чалып дагы 70 миң рубль талап кылган.
"Алынган арыздын негизинде Россиянын кылмыш жаза кодексинин 161-беренеси (уурулук) боюнча кылмыш иши козголгон. Натыйжада шектүү катары 19, 21 жана 28 жаштагы Жалал-Абад облусунун тургундары кармалды", — деп ырасталат маалыматта.
Учурда тергөө иштери уланууда.
