БИШКЕК, 15-окт. — Sputnik. Кыргыз элинин тарыхый жана маданий мурастарын, республиканын социалдык-экономикалык, интеллектуалдык жана руханий потенциалын өнүктүрүүгө кошкон салымы, көп жылдык үзүрлүү эмгеги, каармандыгы жана эрдиги үчүн президент Алмазбек Атамбаев мамлекеттик сыйлыктарды тапшырды.
Сыйлоо аземи "Ала-Арча" мамлекеттик резиденциясында өттү.
Президент өз кесибинин өтөөсүнө чыгып, башкаларга үлгү болгон, мамлекеттин өнүгүшүнө бараандуу салым кошуп жаткан адамдарга жогорку сыйлыктарды тапшыруу чоң кубаныч экенин белгиледи.
"Сиздер мындан да жогорку сыйлыкка татыктуусуздар. Ар бириңиздер ак эмгек, адал мээнетиңиздер менен өлкө тынчтыгын, туруктуулукту жана көп улуттуу Кыргызстан элинин ынтымагын, биримдигин сактоого бараандуу салым кошуп жатасыздар", — деди Атамбаев.
Ал кесипкөйлүгү менен ийгиликтерге жетишип, өлкөгө эмгеги сиңгендерди мамлекет ар дайым колдоого тийиш экендигин баса белгиледи.
Президенттик аппараттын жетекчисинин орун басары рангындагы тышкы саясат бөлүмүнүн башчысы Сапар Исаков II даражадагы "Манас" ордени менен сыйланды. Сыйлык тапшырган Атамбаев Исаковдун улуттук кызыкчылыктарды коргоодо өзүнө көрсөткөн жардамын жогору баалады.
Ошондой эле "Даңк" медалы менен "Город-312" тобунун ырчысы Светлана Назаренко (Ая, автор.) сыйланды. "Азия-MIX" КВН командасынын жетекчиси Элдияр Кененсаров КР маданиятына эмгек сиӊирген ишмер" наамына ээ болду.
Президент "Эл жазуучусу" наамын Жусуп Баласагын атындагы Кыргыз улуттук университетинин окутуучусу, профессор Кадыркул Даутовго тапшырды.
Мамлекеттик сыйлыктар менен кошо Атамбаев бардык сыйлык ээлерине 10 жана 20 миң сом өлчөмүндөгү акча каражаттарын тапшырды. Бул каражаттар Мамлекет башчысынын чечими менен президенттин социалдык коргоо жана колдоо фондунан бөлүнгөн.
