БИШКЕК, 1-окт. — Sputnik. Президент Алмазбек Атамбаевдин Жарлыгы менен өлкө аймагындагы 100 жаштан ашкан карыяларга 10 000 сомдон акчалай жардам көрсөтүлдү. Бул туууралуу өлкө башчынын маалымат кызматы билдирди.
Бул кадам 1-октябрь Улгайгандардын эл аралык күнүнө карата жасалып жатат.
"Мамлекет башчынын тапшырмасы менен президент аппаратынын жетекчисинин орун басарлары Аалы Карашев, Мира Карыбаевалар жана президенттин кеңешчиси Икрамжан Илмиянов өлкө аймагындагы 100дөн ашкан асакалдарга жолугуп, 10 000 сомдон акча жана азык-түлүктөрдү тапшырды", — деп айтылат маалыматта.
Карыяларды сыйлоо үчүн 2 миллион 380 миң сом бөлүнүп, 238 адамдын ар бирине 10 000 сомдон таратылды.
Белгилей кетсек, Икрамжан Илмиянов жолуккан Айлар апа Кыргызстандагы эң улгайган адам болуп саналат. 117 жаштагы апанын 5 баласы, 27 небереси, 78 чебереси жана үч кыбырасы бар.
