"Окуя боюнча Ош шаардык соту КР Кылмыш кодексинин 119-беренесинин (жүктөлгөн милдетти талапка ылайык аткарбоо), 313-берененин (пара алуу) негизинде шаардык төрөт үйүнүн дарыгерлери К.А., А.У. жана М.Э. күнөөлүү деп табылып, 4 жылга эркинен ажыратылды", — деп билдирди Сыдыков.
Маалыматтарда 1988-жылы туулган Сагынбаева операциядан соң 43 күн комада жатып, төрөт үйүндө көз жумгандыгы айтылат. Бул боюнча маркумдун атасы укук коргоо органдарына арызданып, Ош шаардык ички иштер башкармалыгынын 5-бөлүмү иликтөө иштерин жүргүзгөн.
Айыптуулардын мамлекеттик кызматтарда иштөөсүнө, дарыгерлик менен алектенүүсүнө үч жылга чейин тыюу салынды.
"Андан сырткары, мамлекетке жаза катары ири суммадагы акча төлөө милдеттендирилди", — деп кошумчалаган маалымат кызматынын өкүлү.
Сыдыков акыркы бир жыл аралыгында эле аталган төрөткананын гинекология бөлүмүнүн мурдагы дарыгери, азыр жоопко тартылган К.А. катышкан операциядан беш аял каза болгондугун, фактылар иликтенип жаткандыгын билдирген.
