БИШКЕК, 13-окт. — Sputnik. Ош шаарындагы Салижан Шарипов атындагы мектептин дирекциясы 2014-2015-окуу жылында беш окуучуга мыйзамсыз аттестат бергени аныкталганын Sputnik Кыргызстан агенттигине Ош шаардык ИИБдин басма сөз кызматынын өкүлү Замир Сыдыков билдирди.
"Ош шаардык Ички иштер башкармалыгынын 5-бөлүмүнүн кызматкерлери тарабынан аталган мектептин беш окуучусу аталган мектептен мыйзамсыз аттестат алып кеткендиги аныкталды. Тагыраагы, мектеп дирекциясы "башка мектептен окуп, которулуп келди" деген жалган тактамалар менен беш окуучуну 11-класска кабыл алып, аттестат берип жиберген. Ал эми балдар иш жүзүндө тактама алынган мектепте окуган эмес", — деп айтып берди Сыдыков.
ИИМ өкүлү топтолгон материалдар учурда аныкталган фактыга юридикалык баа берүү сунушу менен Ош шаардык прокуратурасына өткөрүлүп берилгенин кошумчалады.
