БИШКЕК, 13-окт. — Sputnik. "Тибиртке" рубрикасы Мамлекеттик тил комиссиясынын жардамы менен диний сөздөрдүн кыргызча маани-маңызын чечмеледи.
Аалым — окумуштуу, илимпоз, окумал.
Аалы — жогорку, жогорку даражалуу, жогорку даражада турган адам.
Багымдат — эки ирекет парз намазы. Багымдат намазынын убагы — чыныгы таң аткандан баштап, күн чыккан мезгилге чейинки учур.
Абат — эл орношкон, берекеси жайнаган жер.
Абу замзам — Харам мечитинин ичинде жайгашкан касиеттүү булактын аты. Дары, эм болуучу, айыктыруучу замзам суу.
Бакыр — материалдык, же руханий жардамга муктаж адам.
Адалат — калыстык, адилдик, калыс, адыл.
Бешим — бешим намазы күн чак түштөн оогон мезгилден тартып, ар бир нерсенин көлөкөсү өз көлөкөсүнөн эки эсе узарган мезгилге чейинки аралыкта, башкача айтканда, чак түштөн 3-3,5 саат өткөн мезгилге чейинки убакытта окулат.
Адам — биринчи киши, топурактан жаралган алгачкы жан.
Гусул — даарат, тулку-бойду бүт белгилүү болгон шарият көрсөткөн тартипте таза суу менен жууп чыгуу. Гусулдун тилдик мааниси "жуунуу" дегенди билдирет.
Адеп — жүрүм-турум сылыктык.
Ажылык — тилдик мааниси улуу нерсени максат кылуу, ал эми шарияттык мааниси белгилүү мезгилде, белгилүү жерде, белгилүү таризде аткарыла турган белгилүү амалдар.
Азан — "кабардоо", "билдирүү", "жарыялоо" — мусулмандарды намазга чакыруу. Ар бир намаздын алдында мусулмандарга намаз убактысын билдирүү иретинде үн чыгарып айтылуучу чакырык.
Даават — динге үгүттөө, чакыруу.
Азим — белгилүү, даңктуу, улуу даражалуу, улуу-урматтуу дегенди түшүндүрөт.
Азирети — ислам динин туткан элде халифтердин, пайгамбарлардын, олуя-машаяктардын улуу даражалуу, улук, улуу урматтуу деген маанидеги титулу.
Дарс — окуу, сабак.
Айт — "майрам" деп которулат. Ислам дининдеги элдин жылына эки жолу майрамдоочу диний майрамы — Орозо айт жана Курман айт.
Жакут — кымбат баалуу жылтылдаган асыл таш.
Акбар — жогорку, бийик, жогорку даражалуу.
Жин — оттон жаралган акылы бар макулук.
