БИШКЕК, 13-окт. — Sputnik. Жогорку Кеңештин депутаты Сайдулла Нышанов Франциянын Страсбург шаарында өтүп жаткан Европа кеңешинин парламенттик ассамблеясынын жыйынында Кадыржан Батыров боюнча билдирүү жасады.
20-сентябрда ЕККУнун Демократиялык институттар жана адам укугу боюнча бюросунун Варшавада өткөн жыйынында Кадыржан Батыров сөз сүйлөп, Конституцияга өзгөртүү киргизүүгө каршы экенин айткан. Мындан тышкары, 2010-жылы анын өлкөдөн чыгып кетиши боюнча жаңы кылмыш ишинин козголушуна нааразычылык билдирип, буга бир катар атка минерлердин тиешеси бар экенин белгилеген.
"Аталган жыйында кыргыз өкмөтүнүн делегациясына жана жарандык коомдун өкүлдөрүнө эле эмес, оор кылмыштары үчүн изделип жаткан Кадыржан Батыровго да сөз берилди", — деди депутат сүйлөп жатып.
Нышанов КРдин Жогорку сотунун чечими менен Батыров 2010-жылы улут аралык араздашууну тутантып, экиден ашуун адам өлтүргөнү үчүн айыпталып, сыртынан өмүр бою эркинен ажыратылганын белгиледи. Мындан тышкары, ал Россия менен Өзбекстанда да шылуундук үчүн издөөгө алынган.
"Кыргызстан кылмыштары үчүн соттолгон жаранга ЕККУнун аянтчасынан сөз берилгенине катуу нааразы экенин билдирет. Кыргыз тарап Батыров саясий көз карашы, улуту же башка нерселер үчүн эмес, кылмыштары үчүн издөөгө алынып жатканын баса белгилейт", — деди депутат.
Нышанов бул Батыровдун эл аралык аянтчаларды пайдалануу менен көпчүлүктү адаштырууга жасаган биринчи аракети эмес экенин айтып өттү.
"Мындан улам биз эл аралык форумдардын криминалдык элементтерге сөз сүйлөө үчүн аянтча берилүүсүнө каршылыгыбызды билдирип, кылмышкерди таап, Кыргызстанга өткөрүлүшүнө башка мамлекеттерди кызматташууга чакырабыз", — деди эл өкүлү.
Ал эми КСДП фракциясынын лидери ЕККУнун Парламенттик ассамблеясында сүйлөп жатып, аталган уюмдун Демократиялык институттар жана адам укугу боюнча бюросунун эрежесин кайра карап чыгуу зарылдыгын белгилеген.
Батыров 2010-жылдын июнь окуяларында улуттар аралык мамилеге от салганы үчүн өмүр бою эркинен ажыратылып, учурда издөөгө алынган.
