БИШКЕК, 11-окт. — Sputnik. Ош шаарындагы Надежда Крупская атындагы №12 орто мектеп жетекчилиги ири суммадагы акчаны жеп койгон. Бул тууралуу Ош ШИИБдин басма сөз катчысы Замир Сыдыков аймактык кабарчыга билдирди.
Маалыматка ылайык, аталган мектептин жетекчилиги 2008-жылдан тартып 2016-жылга чейин иш жүзүндө мектепте иштебеген эки жаранга жасалма табель толтуруп, алардын айлык маяналарын өздөрү алып турушкан. Натыйжада мамлекетке 654 миң 327 сом зыян келтирилген.
Аталган факты боюнча Кылмыш жаза кодексинин 304 (кызмат абалынан кыянаттык менен пайдалануу), 316 (шалаакылык) 171 (Ишенип берилген мүлктү ыйгарып алуу же жок кылуу) беренелери менен кылмыш иши козголуп, тергөө иштери журуп жатат.
Кошумчалай кетсек, 5-бөлүм тарабынан өткөн тогуз айдын аралыгында бир кызмат адамына пара берүү, 10 кызмат адамы тарабынан пара алуу, кызмат абалынан кыянаттык менен пайдалануу боюнча 12 учур, ишенип берилген мүлктү ыйгарып алуунун 7фактысы аныкталган.
