БИШКЕК, 11-окт. — Sputnik. Кыргызстандын чек арачылары бир кызматкери ооруп калып, өзбек дарыгерлеринен жардам алганын Мамлекеттик чек ара кызматы билдирди.
Маалыматка ылайык, "Найзасай" көзөмөл постунда кызмат кылган 17 жаштагы ага сержант Мирланбек Кыдыков ооруп калган.
"Аталган көзөмөл пункт эң алыс жайгашкан аймак болуп саналат. Чаткалдан ары 110 чакырым аралыкта. Мындан тышкары, ал жакка унаа жүрбөйт, жөө же атчан үч күндө жетүүгө мүмкүн. Мындан улам пунктка жакын жайгашкан өзбек чек арачыларынан жардам суралды. Учурда жоокер ооруканада дарылануудан өтүп жатат", — деп айтылат маалыматта.
Ал эми Sputnik Өзбекстан агенттиги өлкөнүн Улуттук коопсуздук кызматынын чек арачылары кыргызстандык жаранды Ташкент облусунун Газалкент шаарындагы дарыгерлердин пунктуна алып келгенин жазып, ал жактан ага медициналык жардам көрсөтүлгөн.
