БИШКЕК, 11-окт. — Sputnik. Премьер-министр Сооронбай Жээнбеков Жалал-Абад облусуна болгон жумушчу сапарында фитосанитардык жана ветеринардык лабораторияларды модернизациялоо жана куруу иштери күчөтүлөрүн билдирген. Бул тууралуу өкмөттүн маалымат кызматынан кабарлашты.
Билдирмеге караганда, өкмөт башчы ишкерлер менен жолукканда алар продукцияларды экспорттоодо сертификат көйгөйү жаралып жатканын белгилеген.
"Кыргыз-түрк ишканасы экологиялык жактан таза жер-жемиштерди, жашылчаларды кайра иштетип, ширенин түрдүү сортторун, ошондой эле уникалдуу жаңгак ширесин өндүрөт. Продукцияны Казакстанга экспорттоо каналдары жөнгө салынганы менен аны сертификатташтыруу көйгөйү бар экени айтылды", — делет маалыматта.
Жээнбеков Евразиялык экономикалык биримдикке кошулуу алкагында өлкөдөгү фитосанитардык жана ветеринардык лабораторияларды модернизациялоо жана куруу боюнча иштер күчтөнгөнүн белгилеген.
"Бул багыттагы иштер жыйынтыкталган соң ЕАЭБ өлкөлөрүнө продукцияны экспортко чыгаруудагы сертификатташтыруу маселеси толугу менен чечилет", – деп ырастаган премьер-министр.
Өкмөт башчы жакынкы жана алыскы чет өлкөлөргө продукцияны экспорттоону кеңейтүү маанилүү экенин белгилеп өткөн.
