БИШКЕК, 10-окт. — Sputnik. Казакстанда маданият жана спорт министри Арыстанбек Мухамедиулынын айланасындагы чатак ырбап бара жатат.
Кайрылууда Сыдыкова аталган окуу жайда 2011-2015-жылдары "музыкалык театрдын актрисасы" адистиги боюнча окуп келгени айтылат. Ал окуу жайга кеч келип калгандыктан, кирүү экзамендерин тапшыра албай калган. Ошол мезгилде ректор болуп турган Мухамедиулы алгач маселени 3000 доллар менен бүтүрүүнү сунуштап, андан кийин ким менен кайда жашарына кызыга баштаган.
"Мындан соң ал "мени менен конокко барасың, ичебиз, бийлейбиз, чер жазабыз" деди", — дейт кыз.
Сыдыкова мурдагы ректордун сунушунан баш тарткан, бирок академияга өткөн. Ал ошондой эле коркконунан улам буга чейин мурдагы ректор ага асылганын билдирбегенин баса белгиледи.
Дүйшөмбү күнү министрлик Мухамедиулынын түшүндүрмөсүн жарыялады.
"Енлик Сыдыкованын билдирүүсүн каралоо деп эсептейм. Андыктан мыйзамдын негизинде ар намысымды коргойм. Кылмыш жаза кодексинде жалаа жапкандарга колдонула турчу берене бар. Мен юристтерге укуктук жардам сурап, жооптуу чараларды көрөм", — деп айтылат Мухамедиулынын билдирүүсүндө.
Министрдин айтымында, актриса Сыдыкованын билдирүүсү "пландалган акция".
"Акыркы окуялардан улам мындай шалтак ыкмаларын колдонулуп баштаганына караганда айрымдарынын нерви чыдабай калды окшойт", — дейт Мухамедиулы.
Анын айтымында, ага карата болгон чагым чуулгандуу "Феникс" тасмасына байланыштуу. Себеби учурда бөлүнгөн каражаттын максаттуу колдонулушу текшерилүүдө.
Май айында Казакстандын Маданият жана спорт министри Арыстанбек Мухамедиулынын кыргыздардын кыздары Москвада ажаткана тазалап жүргөнү зээнди кейитет деген кыязда айткандары бир гана кыргыз коомчулугунда эмес, коңшу казакстандыктар арасында да бир катар нааразычылыктарды жараткан. Кыргызстандын ТИМи Казакстандын элчилигине нота жиберген. Кийин Арыстанбек Мухамедиулы айткан сөздөрү үчүн кечирим сураган.
