Казак министри Россияда иштеп жүргөн кыргыздар тууралуу пикирин айтты

БИШКЕК, 24-май — Sputnik. Казакстандын маданият жана спорт министри Арыстанбек Мухамедиулы кыргыз жазуучу Чыңгыз Айтматовдун чыгармачылыгы боюнча айтып жатып, чет жакта ажаткана жууп жүргөн кыргызстандыктарды көргөндө боору ачый тургандыгын сөз кылыптыр. Бул туурасында казакстандык Tengrinews.kz сайты жазды.

"Чыңгыз Айтматовду окуганда сезимдер бир башкача болот, бул таңгала турган көрүнүш. Өзгөчө, "Ак кемеси"… Жаш кезде окуганда ал жакта аруу сезимди улам издеп, баатырлык кылгың келет. Ал эми азыр кайрадан "Ак кемени" барактаганда, денең бир укмуштуудай "дүрт" этет. Чыңгыз Айтматов улуу жазуучу гана эмес, ал — пайгамбар. Ал өлкөсү, улуту кайда бара жатканын алдын ала көрө билген. Чындыгында эле Кыргызстанда азыр болуп жаткан негативдүү окуяларды тээ 40-50-жылдары эле көрүп, билип коюптур. Тагыраагы, ал элине алаңгазарлыкка алдырып, азыркыдай кадам жасабоону эскерткиси келиптир", – деп айтканын Tengrinews алып берди.

Ал Кыргызстанда иш жана келечек жок болгондуктан, кыргыздар сыртка кеткенге мажбур болуп жатышат деген пикирин билдирген.

"Жашырганда эмне, чынын айтканда, Москвага же башка шаарларга учуп барганда коомдук ажатканаларды биздин кошуналар болгон жаш эле кыздар тазалап жүргөнүн көрүп кейийсиң. Бул албетте, сени адамдык сезимдериңди козгоп, намысыңа тиет. Анын ушундай жапжаш туруп ажаткана жуугудай эмне күнөөсү бар эле. Албетте, өлкөдө иш жок болсо, келечеги жок болсо, көп кыргыздар сыртка кеткенге мажбур болушкан. Чыңгыз Айтматов – залкар жазуучу", – деген маданият жана спорт министри.

Tengrinews бул туурасында чиновник Астанада калың элге отчет берген жолугушуусунда адабият туурасында кеп салып жатканда айткандыгын жазды.