Депутаттар оозунан жаңылганда. Аброй алып келбеген демилгелер

Ушундан улам Sputnik Кыргызстан агенттиги депутаттардын оозунан чыгып, кызуу талкууга жем таштаган учурларды эстеп көрүүнү туура көрдү.

Мугалимдердин кийимин сынга алган Мусабекова

Жогорку Кеңештин тармактык комитетинин шейшемби күнкү жыйынында КСДПчы депутат Жылдыз Мусабекова мугалимдер мектептерге малчылардай болуп кийинип келерин айтып, катуу сынга кабылды. Анткен менен эл өкүлү айтканынан кайтпай тургандыгын, ал эле эмес, айрым мугалимдер чалып, актуалдуу теманы көтөргөнү үчүн ыраазычылык билдиргенин жар салды. 

Аз айлыкка ишенбеген депутат

29-сентябрдагы ЖКнын комитет жыйынында "Өнүгүү — Прогресс" фракциясынын депутаты Гүлшат Асылбаева кыргызстандыктардын 9 миң сомдон аз айлык аларына ишенбей тургандыгын айткан. Депутаттын бул пикири жарыяланаары менен талкууга алынып, эл өкүлүн жерден алып көргө, көрдөн алып жерге чапкандар четтен чыккан. Көп өпөй Асылбаева журналисттер кептин маңызын туура эмес бергенин айтып чыкты.

Эки аял алууну демилгелеген Жолдошбаев

Ушул эле "Өнүгүү — Прогресс" фракциясынын депутаты Камчыбек Жолдошбаев парламентте сүйлөп жатып көп аял алууну мыйзамдаштыруу керектигин балп эткен. Аталган кеп айтылары менен Жолдошбаев заматта айымдардын чабуулуна кабылып, ал дагы журналисттер маалыматты туура эмес таратканын Sputnik Кыргызстан агенттигине билдирди. 

"Мен тескерисинче балдар мыйзамдуу үй-бүлөдө төрөлсүн деп айткам. Маалымат туура эмес кетип калыптыр", — деди Жолдошбаев.

Билимби же тамакпы?

"Балдарды тамагынан ажыратканы жатат!" Социалдык тармак пайдалануучулары социал-демократ Дастан Бекешовдун демилгесине так ушундай жооп беришти. Эскерте кетсек, эл өкүлү мектептерде ысык тамак берүүнү токтотуп, ага кеткен акчаны китеп сатып алууга жумшоону сунуштаган. Кесиптештеринен айырмаланып, депутат айтканын танып кетпей, демилге күчүндө турат.

Депутат деле бирөөнүн баласы…

ЖКнын алтынчы чакырылышынын сессиясы каникулдан башталды. Эс алууну узартуунун демилгечиси социал-демократ Кожобек Рыспаев муну депутаттардын теңи Көчмөндөр оюнуна кетип, баары бир кворум болбой турганы менен түшүндүргөн.

Көчмөндөр оюнунан кийин аталган депутат эл өкүлдөрүн "чурулдатып автобус менен алып барган" өкмөткө нааразы болду. Соцтармактын кыргыз тилдүү пайдалануучулары ой-да Рыспаевдин жазасын беришти окшойт. 

Коомчулукту дүрбөлөңгө ЖКнын буга чейинки чакырылышы да салган. Назарыңыздарда "катуу айтылган" беш демилге.

Атын кантсек?..

Буга чейинки парламенттин көпчүлүк коалициясынын лидери Феликс Кулов өлкө атын өзгөрткөн саясатчы катары тарыхта калгысы келди окшойт. Мамлекетти "Республика Кыргыз" же "Республика Кыргыз Эл" деп атоо сунушун уккандардын көбүнүн чачы тик тура жаздады.

Колуң кана?

2013-жылдын 5-мартында болгон ЖК комитетинин жыйынында Кожобек Рыспаев гимн ырдалып жаткан мезгилде колду көкүрөккө албоону демилгелеп чыкты. Сөзү кур болбосун деп, эл өкүлү атайы мыйзам долбоор иштеп чыкты. Өз сунушун депутат айрым айымдар колун көкүрөккө коюудан уялып жатканы менен түшүндүргөн. Бирок бул демилге депутаттын кесиптештери тарабынан колдоо тапкан эмес.

Ишенебиз…

2011-жылы "Ар-Намыс" партиясынан депутат болуп келген Акылбек Жапаров парламенттин имаратына "Биз Кудайга ишенебиз" деген жазууну илип коюуну сунуштаган. Эл өкүлү буга америкалык конгресстин имаратында жазылып турган "In God we trust" тактасын мисал келтирген. Жапаровдун демилгеси тууралуу керек болсо чет элдик басылмалар да жазып чыккан жайы бар.

Социал-демократ Данияр Тербишалиев андан көрө "Биз эл үчүн иштейбиз" деп жазуу керектигин билдирген. Ал эми дагы бир эл өкүлү Турсунбай Бакир уулу парламенттик трибунага адамдын калпын кармай турган детектор орнотууну сунуштаган. Натыйжада бир да сунуш колдоо таппай, авторлорду соцтармактын пайдалануучулары бир топ сынга алган. 

Шиш така, жарашпайт экен кыштакка

Парламентте кийинип жүрүү маселеси бир топтон бери көтөрүлүп келет, бирок эң эле таасирдүүсү "Ата-Журт" фракциясынан депутат Курмантай Абдиевдики болду окшойт. 2012-жылдын күз айларында ЖК аппаратында иштеген кыз-келиндер атырды абайлап пайдалануусу керектигин айткан. Муну менен бирге эл өкүлү айымдардын бут кийимине да нааразычылыгын билдирген. "Такасы ат басып бараткандай такылдайт. Баары ишин токтотуп, ошону карап калып жатышат", деген депутат. Абдиевдин айтымында, аппаратта иштеген кыз-келиндердин такасы 10 сантиметрден ашпашы керек. Бирок бул демилге ишке ашпай, соцтармактарда депутаттын дарегине бир топ терс маанайдагы пикирлер айтылган. 

Эстеликке эстеп жүрөйүн

2011-жылы КСДПчы депутат, учурдагы төрага Чыныбай Турсунбеков командировкага барган депутаттардын сувенир алуусуна акча берүү сунушун киргизген. Турсунбеков фракция 2 миллион сом үнөмдөп калганын, эмне үчүн ошол каражатты жеке максатта колдонсо болбостугун айтып чыккан. 

Албетте, аталган билдирүү да талкууга алынып, Турсунбековдун эки бетин кызарткан.