БИШКЕК, 21-сен. — Sputnik. Жогорку Кеңеште депутат Аида Салянованын пара тууралуу кабар берген адамга берилген акчанын 30 пайызын төлөп берүү боюнча мыйзам долбооруу кызуу талкууга жем таштады.
Аталган мыйзам долбоору экинчи окууда каралды.
"Бир канча сунуштар түшүп, алар эске алынды. Демилгеге ылайык, ким пара тууралуу маалымат берсе, ошол акчанын 30 пайызын алат", — деди Салянова.
Ал эми "Республика — Ата-Журт" (РАЖ) фракциясынын депутаты Таабалды Тиллаев 30 пайыз каражатты ким төлөй турганын, аталган каражат кайдан алынарына кызыкты.
"Өкмөт 30 пайыз каражатты кайдан алат? Бир чөнтөктөн алып, экинчи чөнтөккө салган туурабы?" — деди Тиллаев.
Салянова 1 миллион сомдук параны ачкан адамга 30 пайызын берүү ашыкча болбойт деген пикирин айтты.
Өз кезегинде башкы прокурордун орун басары Кылычбек Токтогулов негизинен кармалган же аныкталган акча мамлекетке түшөрүн билдирди.
Талкуу учурунда депутаттар Акылбек Жапаров, Мирлан Бакиров, Дастан Жумабеков жана Жанар Акаевдер мыйзам долбоорун колдоп берүүгө чакырып, мыйзамдын иштеп кетүү механизмдерин тактоо сунуштарын беришти.
Аталган мыйзам долбоору экинчи окууда добуш берүүгө жөнөтүлдү.
