БИШКЕК, 16-сен. — Sputnik. "Ала-Арча" мамлекеттик резиденциясында Көз карандысыз мамлекеттердин өлкө башчыларынын мааракелик саммити башталды.
Ага Кыргызстандын президенти Алмазбек Атамбаев төрагалык кылып, Азербайжан, Армения, Белоруссия, Казакстан, Россия жана Тажикстан президенттери, Молдованын өкмөт башчысы, Түркмөнстандын премьер-министринин орун басары, Өзбекстандын тышкы иштер министри, Украинанын Кыргызстандагы элчиси катышууда.
Делегация башчыларын резиденциядан Атамбаев тосуп алды. Жалпы сүрөткө түшүү аземинен кийин жыйын катышуучулары тар чөйрөдөгү жолугушууга жөнөп кетишти.
Эскерте кетсек, буга чейин КМШ мамлекеттеринин ТИМ башчылары жолугуп, саммитте талкуулануучу 14 маселени бекитишкен.
