БИШКЕК, 15-сен. — Sputnik. Президенттин иш башкармалыгынын жетекчиси Туруспек Коеналиев журналисттерге КМШ өлкөлөрүнүн жетекчилери кайсыл жакта конок болорун көрсөтүп берди.
КМШ өлкөлөрүнүн саммити 16-сентябрь күнү Бишкек шаарында өтөт.
"Лидерлерди тосуп алып, коноктоо үчүн Ала-Арчадагы резиденцияда эки кабаттуу үй курулууда. Имараттын курулушу үстүбүздөгү жылдын февраль айында эле башталган, 20-август күнү бүттү", — деди Коеналиев.
Ал ар бир кабат 750 чарчы метрди түзүп, конок үйүнүн жалпы аянты 1,5 миң чарчы метр экенин кошумчалады.
"Бул жерде төрт иштөө бөлмөсү бар. Андан сырткары, ашкана, башкаруу борбору, кийим коюучу жай бар. Бул конок үй атактуу мейманканалардагы президенттик люкс номерлерден кем калышпайт", — деди ал.
Саммитке Армения, Азербайжан, Белоруссия, Казакстан, Россия жана Тажикстандын өлкө башчылары келерин тастыктаган. Түркмөнстандын атынан өкмөт башчынын орун басары келмей болду. Ал эми Молдованын премьер-министри жана Украинанын элчиси келсе, Өзбекстандын атынан өлкөнүн тышкы иштер министри катышат.
