БИШКЕК, 14-сен. — Sputnik. КРде өтө турган КМШ саммитине Өзбекстандын атынан тышкы иштер министри Абдулазиз Камилов келет. Бул туурасында президенттин аппаратынын тышкы саясат бөлүмүнүн башчысы Сапар Исаков Бишкекте өтүп жаткан маалымат жыйынында билдирди.
КМШ өлкө башчыларынын саммити 16-сентябрда Бишкекте башталат.
Исаковдун айтымында, саммитке келерин алты мамлекет — Армения, Азербайжан, Белоруссия, Казакстан, Россия жана Тажикстан билдирди. Түркмөнстандын атынан өкмөт башчынын орун басары келмей болду. Ал эми Молдованын премьер-министри жана Украинанын элчиси катышат.
"Өзбекстандын атынан өлкөнүн тышкы иштер министри Абдулазиз Камилов келет. Бүгүн Шавкат Мирзиеевден жылуу маанайдагы кат алдык. Бул Өзбекстандагы ички иштерге — шайлоого байланыштуу, мунун эки тараптуу мамилелерге эч кандай тиешеси жок. Мен муну расмий түрдө айта алам", — деди Исаков.
Ал 12-сентябрда түркмөн тараптын демилгесинин негизинде Гурбангулы Бердымухамедов менен Алмазбек Атамбаев телефон аркылуу сүйлөшкөндүгүн айтты.
"16-сентябрга аларда Баш мыйзам боюнчап бир канча иш-чаралар белгиленгенип жаткандыктан, алардын жагдайы да түшүнүктүү", — деди Исаков.
КМШнын юбилейлик саммитинде 15 маселе талкууланмакчы.
