Дүйнөлүк көчмөндөр оюндарынын алкагында боз үй тигүү боюнча сынак өтүп, анда Ысык-Ата командасы дүйнөлүк рекорд жаратты. Аталган командадагы алты жигит боз үйдү 10 мүнөт 16 секундда тигишти.
Конкурстун байге фондусчу 150 миң сомду түзүп, анын жүрүшүн 17 адамдан турган калыстар тобу байкап турушту.
Эске сала кетсек, буга чейинки Көчмөндөр оюндарында өткөн боз үй тигүү боюнча сынакта Ысык-Көл облусуна караштуу Тоң району 17 мүнөттө тапшырманы аткарып, биринчиликти багындырган. Ал эми 2015-жылы "Дүйнө элдеринин эпостору" фестивалындагы рекорд 14 мүнөт 10 секунд болуп саналат.
II Дүйнөлүк көчмөндөр оюндары 8-сентябрга чейин уланат.
Sputnik Кыргызстан маалымат агенттиги жана радиосу Дүйнөлүк көчмөндөр оюндарынын расмий медиа өнөктөшү болуп саналат.
