Биринчи орунга чыккан Кыргызстан жана дүйнөлүк рекорд: көчмөндөрдүн үчүнчү күнү жыйынтыкталды

ЧОЛПОН-АТА, 6-сен. — Sputnik. Билинбестен эле II Дүйнөлүк көчмөндөр оюндарынын үчүнчү күнү да артта калды. Мелдештерге жеринен кабарчыбыз Исмаил Мамытов көз салып турду. 

Бул күнү "Кырчын" жайлоосунда 80 чакырымдык ат чабыш жыйынтыкталса, Бактуу-Долоноту айылындагы жаңы курулган ден соолукту чыңдоочу комплексте аба гюреш жана кыргыз күрөш боюнча мыктылар тандалды. Ал эми ат майданда көк бөрүнүн тайпалык оюндары, эр эңиш жана жирит болду. Мындан сырткары "Көгүлтүр Ысык-Көл" пансионатында ордо оюндары уланды. Ал эми "Аврора" пансионатында тогуз коргол жана мангала боюнча спортчулар күч сынашты. 

Саат 9:30да Кырчын жайлоосунда узундугу 80 чакырымдык ат чабыш башталып, 23 чабандес жөнөп кетти. Ал эми байгенин жыйынтыгы боюнча марага тогузунчу номерлүү Чолпон-Атадагы "Асанбек ата" ат заводунун "Ак кула" аттуу күлүгү биринчи болуп келди. 

"Ак куланы" алкынтып чабандес Жеңиш Батыркулов чапты. Ал эми экинчи орунду алтынчы номерлүү Кара-Балта шаарынан келген Алмазбек Ногойбаевдин "Нооруз" күлүгү багындырды. Анын чабандеси Чыңгыз Иманалиев

Үчүнчү орунду Талас облусундагы 113-ат заводунун "Көк серек" аттуу жылкысы ээледи. Анын чабандеси Рыспек Карыпов. 

Мындан сырткары саат 10:00дө "Кыргыз айылы" шаарчасында этно мода көргөзмөсү болду. Анын жыйынтыкталышы менен көпчүлүк күткөн ылдамдыкка боз үй тигүү конкурсу ачык деп жарыяланды. Анда баарынан биринчи болуп Ысык-Ата командасы — 10 мүнөт 16 секундда тапшырманы аткарып, жаңы рекорд жарата алды. Ал эми ошол эле сааттарда жаа атуу жана тайган жарыштын жарым финалдык оюндары болду. Аталган спорттун түрү боюнча финалдык беттештер эртең уланат.

Ат майданда болсо көк бөрүнүн тайпалык оюндары жыйынтыкталып, финалда беттешчүлөр аныкталды. Ошентип 7-сентябрда Кытай менен Башкыртстан үчүнчү орун үчүн ойносо, 8-сентябрда Кыргызстан менен Казакстандын көк бөрүчүлөрү биринчиликти талашат. 

Тогуз коргол боюнча кыргызстандык спортчулар Анарбек Жамакеев алтын алса, Кубаныч Сазаев, Аида Керимбековалар күмүш медаль тагынышты. Мангаладан да кыргыз спортчуларына ийгилик жылмайып, Кубаныч Ибраимов менен Гүлжамал Сарыкеева биринчиликти багынтышты. Акылбек Касымов менен Азиза Жамансартовалар күмүшкө ээ болушту.

Кыргыз күрөшү боюнча жети салмактык категорияда медалдар ойнотулуп, алтындарды кыргыз балбандары чогултуп алды. Күрөштүн жыйынтыгы боюнча Тынчтыкбек уулу Бекзат (55 кг), Сымбатбек Алимбеков (60 кг), Зиямидин Шадыбеков (66 кг), Тариэл Үсөнов (74 кг), Бектурган Кожомуратов (84 кг), Нурбек Кожобеков (96 кг) жана Бекболсун Кушубаков (96 кг жогору) биринчиликти камсыздашты.

Ал эми Казакстан үч күмүш, бир колого ээ болсо, Россиянын спортчулары эки күмүш, үч коло тагынышты. Тажикстандык спортчулар бир күмүш, бир коло, Түркмөнстан, Венгрия жана Монголия экиден коло, Азербайжан бир коло медалдарды куржундарына салышты.

Абагюрештен монгол балбаны Енгтугс Оюнболд биринчиликти, россиялык спортчу Рустам Арсланов экинчиликти алса, кыргызстандык Орозбек Аширов менен Ильяз Нишанов коло тагынды. 

Үчүнчү күндүн жыйынтыгы боюнча тизме: 

1. Кыргызстан — 13 алтын, 12 күмүш, 13 коло; 
2. Россия — 10 алтын, 5 күмүш, 6 коло;
3. Казакстан — 5 алтын, 6 күмүш, 7 коло;
4. Азербайжан — 3 алтын, 3 күмүш, 3 коло; 
5. Грузия — 2 алтын, 1 күмүш;
6. Иран — 2 алтын, 4 коло; 
7. Тажикстан — 1 алтын, 1 күмүш, 2 коло; 
8. Өзбекстан — 2 күмүш, 4 коло; 
9. Армения — 2 күмүш, 1 коло; 
10. АКШ — 2 күмүш, 1 коло; 
11. Украина — 1 күмүш, 3 коло; 
12. Польша — 1 күмүш, 1 коло;

Түркмөнстан менен Монголия бештен коло утса, Венгрия төрт, Литва үч, Норвегия эки, Кытай бир колого ээ болушту. Калган өлкөлөрдүн спортчуларына ийгилик жылмая элек.