БИШКЕК, 29-авг. — Sputnik. "Саякбай" тасмасынын режиссеру Эрнест Абдыжапаров башкы ролдорго актерлор тандалып бүтүп, фильм тартылып баштаганына эки гана күн болгонун билдирди.
Анын айтымында, Саякбай Каралаевдин ролуна белгилүү актер Марат Жанталиев тандалган. Орто жаштагысын Бактыбек Нурмат ойнойт. Ал эми кичинекей кезин жаш манасчы Болот уулу Үмөт аткармакчы. Саякбайдын байбичеси Бейшекан апанын ролун Тынара Абдразаева ачса, жаш чагын Рахат Божокоева ачып бермей болду.
Тасманын режиссеру гана болбостон сценарийин да жазган Эрнест Абдыжыпаров тасманын өзөгүн эмне түзөрүн мындайча баяндады:
Ал эми Чыңгыз Айтматовдун ролун жазуучунун кичүү уулу Элдар аткармай болду.
"Ал кезде Чыңгыз ага да жаш болчу. Ошон үчүн биз өзүнө окшош баласынан башка адамды ыраа көрбөдүк окшойт", — деди Абдыжапаров.
Режиссер тасма Ысык-Көлдө тартылып жатканын, бир ай убакыттын ичинде 1,5 сааттык тасманы тартып бүтүүнү пландап жатканын айтты. Абдыжапаров бирок бул убакыттын ичине Саякбайдын бүт өмүрүн батыруу мүмкүн эмес экенин кошумчалады.
