БИШКЕК, 11-авг. — Sputnik. "Сейтек" балдар борборунда Улуу Ата мекендик согуштун ардагери Асек Урманбетовдун кайрымдуулук акциясы өткөрүлөт.
Пенсия курагындагы ардагер Чүй облусундагы аз камсыз үй-бүлөлөргө бир миллион сом бөлүп берери тууралуу Sputnik Кыргызстан агенттигине кызы Майрамкүл Урманбетова билдирди.
Урманбетов 2004-жылы муктаж адамдарга колдоо көрсөткөн "Ак жол" фондун түзгөн. Ардагер жазуучулук менен алектенип, андан тапкан каражатын дагы кайрымдуулукка жумшап келет.
Кызы Майрамкүлдүн айтымында, бир миллион сомду ардагер 2007-жылдан бери топтоп келген.
"Атамдын башынан көп нерсе өткөн. Ошон үчүн элге жардам берип келет. Анын бир буту жок. Өзү 93 жашта. Ал тапкан акчасын кайрымдуулукка жумшап келет", — деп билдирди Урманбетова.
Бир миллион сом Бишкек шаарындагы төрт райондун муктаж тургундарына таркатылат.
