БИШКЕК, 09-август. — Sputnik. Өлкөдө "Кыргыздын салттуу балдар баш кийими" деп аталган конкурс өткөрүлүп, ага каалаган тараптар катыша алат. Бул туурасында "Роза Отунбаеванын демилгеси" эл аралык коомдук фондусунун сайтында кабарланган.
Бул конкурстун максаты — кыргыздардын маданий жана руханий жактан бирдейлиги катары балдардын салттуу кийимине кызыгууну кайра жаратуу. Маданий-руханий эстелик катары баш кийимдердин ар түрдүүлүгүн сактоо, Кыргызстандын, региондун чектеринде жана чет өлкөлөрдө баш кийимдерди элдин маданий бирдейлигинин элементи катары даңазалоо деп белгиленген.
"Конкурска катышуу үчүн элдик чеберлер, сүрөтчү-модельерлер, республиканын атайын чыгармачыл жогорку жана атайын орто билим берүү мекемелеринин окуучулары жана педагогдору чакырылат. Катышуучулардын курагы чектелбейт", — деп айтылат маалыматта.
Модельерлерден, тарыхчылардан жана этнографтардан турган калыстар тобу мыкты костюмдарды бир нече критерийлер боюнча тандайт.
Конкурстун жыйынтыктары "Манас урпактары" деген аталыштагы фестивалдын алкагында 2016-жылдын 5-ноябрында чыгарылат.
