БИШКЕК, 9-авг. — Sputnik. Ош шаарынын тургуну Абдишүкүр Абдилатипов үйлөнүү тоюнда той-топурга кете турган акчага ооруп жаткан жарандарга китеп таратууну чечти. Бул тууралуу ал өзү Sputnik Кыргызстан агенттигине билдирди.
Эске салсак, буга чейин Бишкек шаарынын тургуну Азат Аманов да тойго кетчү кошумча чыгымга колунда жок кишилердин балдары үчүн мектепке керектүү форма, дептер, калемдерди сатып берген болчу. Ал мындай иштерди эстафета катары Темирлан Токоев аттуу жаранга сунган. Ал эми Токоев эстафетаны Абдишүкүр Абдилатиповго узаткан.
"Ош облусундагы ооруканаларда узак убакыттан бери ооруп жаткан жарандарга "Капаланба" деген китепти тапшырууну туура көрүп жатам. Себеби, ооруган адам стресске көп кабылат. Алар моралдык колдоого муктаж. Китеп алардын жашоого болгон үмүтүн арттырат деген ойдомун", — деп билдирди Абдилатипов.
Ал мындай иш-чараны улантуу максатында эстафетаны жакын досторунун бирине узатарын кошумчалады.
Китептерди тапшыруу аземи 10-август күнү Ош облустук ооруканасынын аянтчасында өткөрүлөт.
