БИШКЕК, 29-июл. — Sputnik. "Кыргызалтын" ишканасынын эсебине Centerra Gold Inc. тарабынан 14,3 миллион доллар дивиденд түрүндө которулганын ишкананын маалымат кызматы билдирди.
Үстүбүздөгү жылдын 20-июлунда Канаданын Онтарио провинциясынын Жогорку соту "Кыргызалтын" ишканасынын Centerra Gold Inc. компаниясындагы бардык акцияларын камактан чыгарган (11,25 миллион даана).
"2016-жылдын 26-июлунда "Кыргызалтындын" эсебине дивиденд түрүндө 14 миллион 280,1 миң доллар түштү", — деп айтылат маалыматта.
Буга чейин (2011чи жана 2014-жылдары) төрт компания — "Манас Банк" ЖАКтын акционерлери, В. Белоконь, түрктөрдүн Sistem Muhendislik Insaat Sanayi ve Ticaret Anonim Sirketi, Stans Energy Corp компаниясы жана Entes Industrial Plants Construction & Erection Constructing Co. Inc. компаниясы Онтарионун жогорку сотуна кайрылган. Алар Кыргызстандын эл аралык арбитраждык чечимдерди аткаруусун талап кылышкан.
