БИШКЕК, 29-июл. — Sputnik. Президент Алмазбек Атамбаев II Дүйнөлүк көчмөндөр оюндарына карата Бактуу-Долоноту айылында курулуп жаткан ипподромдун курулушу менен таанышып чыкты. Бул тууралуу өлкө башчынын маалымат кызматынан билдиришти.
Ага ылайык, ипподромдун курулуш иштерине бир миңден ашык жумушчу жана 80 даана техника тартылган.
"Президент ипподром менен спорттук аянт жогорку сапатта курулуусу керек экенин белгиледи. Муну менен катар өлкө башчы "Газпром Кыргызстан" ишканасынын колдоосу менен эки миң чарчы метрлик үч кабаттуу дене тарбия комплексинин курулушу менен дагы таанышты", — деп айтылат маалыматта.
Ал эми Архитектура, курулуш жана коммуналдык чарба агенттигинин директору Турдубек Мамбетов ипподромго отургучтар коюлуп, жарышка ылайыкталган негизги жолду бүткөрүү иштери аяктап калганын билдирген.
Sputnik Кыргызстан агенттиги Дүйнөлүк көчмөндөр оюндарынын расмий медиа өнөктөшү.
