БИШКЕК, 29-июл. — Sputnik. Бишкектик жаран жогорку окуу жайлардын бириндеги аскердик кафедрага тапшыруу үчүн 2500 долларын алдатып жиберген. Бул тууралуу Бишкек шаардык ички иштер башкамалыгынан кабарлашты.
Маалыматка караганда милицияга арыз менен кайрылган жаран 2015-жылы чала тааныш аялга акчасын карматып коюп, ошону менен аны таппай калган.
"Акчаны алган аял жарандын ишенимине кирип, аскердик кафедрага өткөрүп берүүгө сөз берген", — деп айтылат маалыматта.
Аталган иш боюнча Кылмыш жаза кодексинин 166-беренеси (алдамчылык) боюнча кылмыш иши козголуп, анын негизинде шектүү катары 36 жаштагы аял кармалган. Тергөө учурунда аталган жаран дагы ушуга окшош 1 кылмыш ишине тиешеси бар экени аныкталган.
