БИШКЕК, 22-июл.— Sputnik. "Ыйман" фондусунун окуу курсун аяктаган Ош облусунун аймагындагы 70 мечиттин имамдары атайын сертификат алышты. Бул туурасында Ош облусунун мусулмандар казыятынан кабарлашты
Окуулар Ош мамлекеттик университетинин теология факультетинде өтүп, аны Кыргызстан мусулмандар дин башкармалыгы жана "Ыйман" фондусу биргеликте уюштурган.
Ыйман фондунун өкүлү Муртаза Жолдошовдун айтымында "Дин кызматкерлеринин ишмердүүлүгүн жана билим деңгээлин жогорулатуу" долбоорунун алкагында эки жумалык окуу курсунда диний сабактардан сырткары "Тайм-менеджмент", "IT –технология", "Исламдагы укук негиздери", жана "Сүйлөө чеберчилиги" сабактары окутулган.
Бул сапар Араван, Кара-Суу жана Ноокат райондорунун диний кызматкерлери билим алышты.
Маалымат кызматы Ош облусунун кезектеги имамдарын окутуунун экинчи этабы жакында башталарын кошумчалады.
