БИШКЕК, 15-июл. — Sputnik. Бишкек шаарындагы 6-кичи районунда көчө китепканасы ачылганын "Инсан таануу" коомдук бирикмесинин жетекчиси Элдос Шерматов Sputnik Кыргызстан агенттигине билдирди.
Атайын шкафтарды бул аймакка орнотууга райондун акимчилиги уруксат берген.
"6-кичирайонго атайын тапшырык менен 30 миң сомго жасалган бир шкаф коюлат. Ал жерде түрдүү жанрдагы китептер коюлду. Жергиликтүү тургундар дагы китептерди алып келишти", — деди ал.
Шерматов мындай көчө китепканасы буга чейин Ош шаарында орнотулганын айтты.
Көчө китепканасынын текчесинде көбүнчө Кыргызстандын жана дүйнөлүк адабий чыгармалар коюларын, андан колдонуу бекер жана 24 саат бою ачык турарын Шерматов баса белгиледи.
Аталган коомдун өкүлдөрү маданияттуулук китеп окуу аркылуу калыптанаарын белгилеп, жарандарды билимге умтулууга үндөшөт.
