Франциянын Ницца шаарындагы трагедияда КР жарандарынын бар-жогу такталууда

БИШКЕК, 15-июл. — Sputnik. Кыргызстандыктардын Ниццадагы калабада бар-жоктугу Тышкы иштер министрлиги тарабынан такталып жатат. Бул туурасында ТИМдин маалымат кызматынан кабарлашты.

Кечээ Франциянын Ницца шаарында фейерверк көргөнү чогулган топту жүк ташуучу унаа аралап кетип, элди тебелетип, андан 80ге чукул киши каза тапкан.

RTBF телерадиокомпаниясы 120га жакыны жарадар болгондугун кабарлаган. 

Эл аталган аймакка Бастилиянын алынышына карата майрамга чогулган. 

"Учурда министрлик Ниццадагы терактыда Кыргызстан жарандарынын бар-жогун тактап жатат",— деп айтышты маалымат кызматынан.

Окуя кечээ түндө, 14-июлда болгон. Франциялык басылмалардын жазганына караганда, автоунаа эки чакырымга чейин токтобой, полиция айдоочуну атып өлтүргүчө чогулган элди тебелетип жүрүп отурган. Күбөлөрдүн айтымында, ал унааны түз эмес, ары-бери жакка буруп, көбүрөөк курмандык жараткандай маанайда айдаган.

Акыркы маалыматтарда, каза болгондордон арасында кичинекей балдардын арбын экендиги айтылууда.

Өлкө президенти Франсуа Олланд бул окуяны теракт деп атады.

Терактыны БУУ баштаган бир катар эл аралык уюмдар жана көп мамлекеттер айыптап, ага карата нааразычылыгын билдиришүүдө.