БИШКЕК, 15-июл. — Sputnik. Франциянын Ницца шаарында фейерверк көргөнү чогулган топту жүк ташуучу унаа аралап кетип, элди тебелетип, андан 80ге чукул киши каза таап, 120га жакыны жарадар болгону айтылууда. Өлкө президенти бул окуяны теракт деп атады.
Окуя кечээ түндө болгон. Франциялык басылмалардын жазганына караганда, автоунаа эки чакырымга чейин токтобой, полиция айдоочуну атып өлтүргүчө чогулган элди тебелетип жүрүп отурган. Күбөлөрдүн айтымында, ал унааны түз эмес, ары-бери жакка буруп, көбүрөөк курмандык жараткандай маанайда айдаган.
Акыркы маалыматтарда, каза болгондордон арасында кичинекей балдардын арбын экендиги айтылууда.
Чабуулдан кийин аскердик атайын операция башталган.
Акыркы маалыматтарда, элди тебелеген автоунааны теги Тунис өлкөсүнөн болгон Ницце шаарында жашаган 31 курактагы киши айдаганы аныкталган. Буга чейин ал полициянын көзүнө майда кылмыштар менен түшүп келгендиги, бирок, террорчулар менен байланышы байкалган эмес деген маалыматтар айтылууда. Бул туурасында Nice Matin басылмасы жазды.
Франциянын президенти өлкөдө үч айга чейин өзгөчө кырдаал жарыяларын айтты.
